مدرسة الحب رواية سودانية قصيرة - مدونة روايات سودانية
مدرسة الحب
هذه الرواية أحداثها حقيقية
يمكنك تحميل الرواية PDF بانقر هنا
الحلقة الاولي
مدرسة الحب
تتحدث القصة عن شخص يقع في حب بنت خالته فهل يا تري سنصفه الحب أم يجعل منه احد الضحايا تابعو معي ...
عبد الرحمن او كما يطلق عليه عبدو شاب ف مقتبل العمر يدرس في إحدي الجامعات شاب خلوق ومهذب في يوم من الايام وفي زيارة كل عام حيث يكون العيد في "البلد" يسافر معظم الناس الي هناك حيث الهدؤ والطعم الحقيقي للعيد ، كان عيد فطر حين ذهب عبدو ليهنئ جدته بالعيد وعند دخوله المنزل بدأت القصة ...
يا سلاااااام ياخ يا والله الليلة مبسوط جنس بسطة يا محمد يا ود عمي العيد دا حاجة حلوة ياخ وخصوصا هنا في البلد ياخ الحمد لله انحنا من قمنا ما عيدنا في الخرطوم الا مرة واحدة بس
محمد : والله مشاء الله اها والمرة الواحدة دي قلتو تغيرو شوية والا شنو
لا والله يا محمد بس امي صادفت الساعة ديك انها والدة بي اخوي الصغير يا حبوبة سلااااام عوووووك حبووووبة
حبوبة : اهلا اتفضلو اتفضلو
اوووو حبوبة حبوبة كل عام وانتي بخير كيف الاحوال ان شاء الله طيبة
حبوبة :وانت طيب عيدا يا يابا يكبركم ويزوجكم وتلقو الفي مراضكم رب العالمين اتفضلو شيلو الحلاوة
تكرمي يا حبوبة
حبوبة : جيتو متين
جينا امس بالليل والله ياهو زي كل سنة بنجي يوم التاسوعة بالليل ، انتي احوالك شنو يا حبوبة ان شاء الله تمام
حبوبة : احمد الله يا ولدي الا الكرعين موجعاتني خلاااص وقفني من الحركة تب
ربنا كريم يا حبوبة خالتي وين خالاتك هناك ف الاوضة دي
ايوا النمشي اسم عليهن وعايزين نتم لفتتا علي باقي الناس
خالاتي سلاااااام
اهلا هلا بالشباب مرحب بي ود اختي خالتي اشراقة كل سنة وانتي طيبة اووو خالتي عواطف كل سنة وانتي طيبةمشاء الله مرحبا بالبنات اهلا ازيك يا سمر ماشاء الله ازيك ياااا هديل "مديت يدي ليها والله لمن صافحتها حسيت انو اي زول بعاين لي حسيت بي احساس غريب بقيت بردد في جواي ماشاء الله متين هديل كبرت واتغيرت كده وبقت جميلة شديد" اوووو هديل كل عام وانتي بخير
هديل: وانت بالف خير ربنا يحقق الاماني
اللهم امين جمعا " بقيت بعاين في عونا اتمنيت انو يدي ما تزح من يدها ماشاء الله ،
اتفضلو اقعدو يا اولاد
والله يا خالتي ماشين لافين بنجيكم ...
مرقت من بيت حبوبتنا وانا فرحان فرح شديد يا الله هديل القريب دا كانت صغنونة اسي كبرت ماشاء الله بقت قمر اربعطاشر
محمد: ما جاوبتني يا عبدو ما سامعني والا شنو سرحت وين انت ، قلت ليك نغشي اول منو ناس الهادي والا ناس كمال ...
نمشي ناس كمال اول لانو من بيتم في زقاق مختصر بنلف بيهو وبختصر لينا الدرب اها خلاص ارح ....
وتستمر القصة...
الحلقة الثانية
#مدرسة_الحب
عن أحداث حقيقية
"هكذا ودون إستئذان يدخل الحب قلوبنا كما تدخل الرياح عبر النوافذ والابواب إما كانت هذه الرياح نسيم عليل أراحنا واما كانت عاصفة هوجاء تقتلع كل ما ترعاه من أمنيات "
ابوحميد
يااااا سلام يا محمد ياخ والله تعرف بعد لفينا لفتنا الطويلة وسلمنا علي اهلنا كده نحن عيدنا عيد صاااح كدي شغل معاك المروحة دي
محمد: والله اقول ليك كلام ياااا عبدو أنا عيدت في الخرطوم كم مره اقسم بالله عيد بايخ شديد تعرف تمشي تصلي صليت تلف علي جارك وتدخل البيت والعيد انتهي
والله كلامك صاح يا محمد هنا الناس زاتا ما مهوسة ما زي ناس الخرطوم دايشين ورايشين الواحد سلام الله ما بردو ليك
محمد : والله الخرطوم جلحة جنس جلاحة سجمانة سجم .
اوووو جدي يا جدي كل عام وانت بخير السنة الجاية عرس
جدي: ها جنه ها انت مفرطق؟! عرس شنو اعرس فوق حبوبتك ؟ وانت طييب والسنة الجاية متخرج من الجامعة وشغال ...
امين امين ياحاج قول عريس قول عريس
محمد: جدي كل عام وانت بخير العام القادم في عرفات
جدي: اووووو محمد وانت بخير وعافية والسنة الجاية زيوما عايز وعريس كمان وشغال ، هاك يا عبدو يا ولدي علق لي الجلابية دي هناك ودخل لي المركوب دا جوه وجيب لي الشبشب الاسود الجنب الباب دااااك
ياجدي شبشبك دا قديم ياااخ الدنيا عيد
جدي: قلت كدي اها تلقالك واحد جديد جوه الاوضة في الدولاب جابو لي ابوك وزاتو ابوك جاء
ابوي : سلاااام هوي يا حاج كل عام وانت بخير مرة تانية والقابلة علي عرفات ، اووو عبدو ما اتلاقينا كل عام وانت بخير والعام الجاي زي ما انتو عايزين اوووو عبدو
"كانت هكذا تبدو مشاعر العيد عند كل صباح الكل مبتهج بحضوره أو معظمنا مبتهج بحضوره ..."
عدا اليوم الاول بعد ما قعدنا اتونسنا مع جدنا ومليت ليو الابريق وعصرت ليو ضهرو وسندتو ومشينا الديوان بره للفطور اي زول بجيب فطورو في الديوان برة كل الناس بتفطروسوا وبتونسو فطرنا وشربنا كباية شايينا ودخلت بيت جدنا جوه اخدتا رقده علي السرير بفكر ساااااي في بت خالتي البقت زي القمر ، كانو لسة بعاين ليها قدامي قريب للعصر الساعة تلاتة مشيت علي حبوبتي ام ابوي وتونستا معاها كان معانا اعمامي الاتنين وعماتي، أثناء الونسة كدة في صوت بنات جن بقولن سلام وعليكم ناس البيت
عمي : مرحبا اتفضلوو
البنات : سلام عليكم كل عام وانتم بخير اهلا...
سلمن علينا كلنا وابن يقعدن قالن لافات علي البيوت يباركن العيد ، مرقن كده تسع عمي ...
عمي: ماشاء الله دي بت عواطف ماشاء الله كبرت وبقت للعرس
عمتي : اي والله ماشاء الله
عمي : حقو يا عبدو امك دي تحجزا ليك
يا عمي تحجز شنو هي قطعة واطة امن يحجزوها؟! انا ما بفكر في العرس اسي ، قلت ليهم كده وهم ما عارفين انو انا من شفتا الليلة قلبي دقه اي والله لمن افكر فيها واتذكر نظرتا لمن نفسي بقوم او بالاحري عيونا لمن بجيني احساس كيف كيف تميت الونسة ومشيت رقدته بفكر في هديل سااااااااااي ، الواطة كانت عصرا متاخر كده بقيت زي ما بقولو بجلب اقوم واقعد في السرير اها اسي امشي ناس حبوبتي وناس خالتي اقول شنو اها قول اتونست معاهم اها قول هي كانت قاعدة اها انا بقدر امسك روحي والا بخاف اها ولو قعدتا اقعد قدر شنو اها والمواضيع الحا افتحا شنو بس انا لازم امشي ياخ ولو مشيت ح القي كمية حريم ملمومات وانا جني وجن الحريم الكتار ياخ اقول ليك كلام انا بمشي اقسم بالله كنت بكلم روحي زي المجنون وصلت ناس حبوبتي وخالتي سلاااك وعليكم ، اهلا مرحب اتفضل ي عبدو اقعد ، اقسم بالله لمن سلمت علي خالتي واللحظة السلمت فيها علي هديل قلبي قرب يتلب من حتتو بقيت زاتي ما عارف روحي مالي بقيت واقف بس ...
حبوبتي وخالتي : اقعد يا عبدو
والله ماشي جيت اشوف علي ود خالتي دا هنا ؟
خالتي : علي مافي والله من قبيل مافي بكون في ديون حاج العبيد
ايوا خلاص النمشي عليهم ....
ما قدرت اقعد والله وانا اصلا جاي من هناك شان اقعد معاهم واتونس بس ما قدرت والله ومرقت فت ...
الحلقة الثالثة
#مدرسة_الحب
عن احداث حقيقية
سلني عن الحب أخبرك أنه شفاء وداء ، يشفي العاشقين حين ينصفهم ويعيهم حينما يغدر بهم .
ابو حميد
مشيت ديوان حاج العبيد وانا زعلان علي نفسي لاني من قبيل اقول اقعد مع ناس خالاتي بس لمن وصلت ليهم قعدتا اتارجف ، دخلت الديوان ليقت علي ود خالتي بلعب ومعاو شلة كتشينة السجاير مدور والتمباك ، قعد حبة كده بعد شوية المغرب اذن صلينا ود خالتي قال لي نمشي بيت ناس حبوبة ونمشي نشرب الشاي ، كنت متحمس شديد قلت ليو ارح ، مشينا لقيت خالاتي مافيشيات بس في حبوبة ومعاهت كم شافع قعدنا اتونسنا معاها بعد شوية هديل جات ومعاها صحباتا وبنات خالاتي
هديل : سلااام وعليكم
يا هديل كيف الاحوال
هديل : الحمد لله مشينا ناس انتصار فورنا عندهم اللبن غاذ حبوبة قاااطع ...
بالله يا حبوبة غازكم قطع
حبوبة : اي والله قطعت قبيل والله يا عبدو يا ولدي مليناها قريب دا بس انا قدر ما ارسل علي للغاز اقول ليو أعزل التقيلة المليانه شديد
وقنبنا نضحك
حبوبة مليانة شديد شنو ياخ كلهن واحد
حبوبة : اسكت يا عبدو ها والله من واحد
وقنبنا نضحك
يعني يا علي ما عندكم شاي مغرب
بت خالتي "سهي": شنووو ما عندنا شاي مغرب دا كلام يا باش مهندس اسيييي نعملو ارحكن يا بنات ناس خيرية نسوي عندهم الشاي انتصار لو مشينا ليها تاني بدقنا
هديل : امشن براكن انا فترت والله
بنات خالاتي مشن
علي : خليك قاعد يا عبدو ماشي وجاي
حبوبة: يا ود يا علي اوع تكون ماشيلك حفلة
علي: حفلة شنو يا حبوبة ساعة المغرب ماشي الدكان
" بالعناقريب الثلاثة واحدة فيو حبوبتي وواحده فيو هديل وواحد في انا جنبنا المزيرة والحتة صااااااانة واللمبة الحمرة الفي كوع الركيزة ملمومة جنبها الحشرات والكديسة الببحاوم تحت الشرير وريحة البحر البتجي مرة مرة ، والقراص ، بدينا نتونس انا وهديل ....
يا هديل اخبارك شنو ؟
يل :والله الحمد لله مافي اي عوجات اخبارك شنو انت
تماااام والله نحمد الله
هديل : انت في الجامعة صاح
اي والله ، السنة الرابعة هندسة مدنية، وانتي
هديل : الحمد لله يادوب السنة الاولي محاسبة الزعيم انت السودان صاح
اي والله ، تعرفي يا هديل اخر مرة اتلاقينا متين والله التقول قبل خمسة سنة كنتي صغيررررووونه
هديل: اي والله زمن ياخ والله انت اتغيرت تغير
عجزت صاح
وقنبنا نضحك
حبوبة : اسي يا اولاد الانبوبة دي اتلقي حاج الحسن بدس التقال جوووه ببيعن لي قرايبو
وقنبنا نضحك
الحلقة الرابعة
#مدرسة_الحب
عن أحداث حقيقية
"قلوبنا ليست حجارة لكن يزيدها الغضب والحقد قسوة وهي ايضا ليست كالزهور لكن يزيدها الحب عطرا وجمالا"
ابو حميد
تعرفي يا هديل زمن اخر مرة شفتك فيها كنتي شافعة عديل اقسم بالله قريب دا تلعبي بالتراب
هديل : هوي هوي منو البتلعب بالتراب يا عبدو
وقنبنا نضحك
يااااااااااسلام والله كان اول مرة اتونس مع بت ونسة زي دي ومنو بت خالتي سبحان الله ونسة مع زول ساي تحسسك بي احساس بالقروش ما بتلقي ...
بعد شوية كده العوارض جو ههههههه اقصد بنات خالاتي جن وجابن الشاي ، وعلي زاتو جا جاب الشاي
علي : معليش يا عبدو اتاخرت لقيت محمد ود الزين قال لي الا اوزن ليو الطبق
واصلنا ونستا كبو الشاي اقسم بالله الشاعة هديل شالت الكباية وقالت لي امسك اشرب يا عبدو انا قلبي قالللللل ششششححححححكح، مسكت الكباية وانا ايدي بترجف ،اتونسنا وقنبنا نضحك ونسمع في حكايات حبوبة حكاية حكاية شئ عن ايتم زمان وشئ عن جدو الله يرحمو وقصص حفظناها من كترة من كررتا لينا ، ياااااحبوبة دي قلتيها ونضحك ...
"كانت لمة ما احلاها من لمة لمة سرقتها الايام دي التلفونات والشاشات وقطعان الرحم لمة سرقتها الغرابة والغربة واعزار الناس الواهية البلخصوها في كلمتين " جري شديد" ...
مشيت رقدت ليلي داك فرحان فرح فتحت تلفوني قبل ما انوم الشبكة في البلد كعبة خط ما بتلم فيو لا رسالة فيس ولا مكالمات ....
كنت منتعش بقيت بفكر في هديل وكانو اسي جنبي بتتكم معاي ، في اليوم البعديو اصبحت مبسوط بسطة جد ، عدا اليوم وبالمغرب مشيت علي ناس حبوبة لقيتم قاعدين في الغرفة وهديل بتكوي كنت سرحان في عيونا بس علي الرغم من انو الناس بتتونس الا كنت سرحان في عيونا ...
انتهي العيد وشاءات الاقدار اننا ركبنا حافلة واحدة مؤجرنها ، ركبنا ركبنا فيها امي وابوي واخواني وهديل واسرتها وخالاتي هديل واسرتا نزلو قبلينا في حي قبالة الخرطوم وانا وصلت البيت وكان احلي عيد بالنسبة لي ، بالمناسبة ف حاجة ما قلتها ليكم قبل يوم من نجي مشينا انا وبنات خالتي البحر وقلت ليهم النصور صور جماعية وكان كل همي انو احصل علي صورة لي هديل شفتو كيف ...
الحلقة الخامسة
#مدرسة_الحب
عن أحداث حقيقية
"الخطأ الذي نقع فيه فيما يتعلق بالحب هو اننا نقارن في كل مرة ونتذكر حب من خاننا او حب من أخذه القدر منا ففرقنا ،نحن نظلم قلوبنا دائما و قلوبنا ما هي الا مثل ورود الشتاء تذدهر كلما مر عليها برد " ابوحميد" "
رجعنا من البلد وزي ما قلت ليكم كان احلي عيد بالنسبة لي ، بعد كم يوم نزلت الجامعة اقسم بالله اول ايام من جيتي من العيد بقيت بصحي من قبل صلاة الصبح بس بفكر في هديل انا في العادة بنوم لحدي الصباح فد رقدة لكن بقيت بصحي وبس بفكر في هديل ، راسي بقي ضارب كيف اتواصل مع هديل قلت افتش الفيس فتشتو ولقيت هديل ورسلت ليها طلب بقيت كل دقيقة بفتح الفيس اشوف هل قبلتو والا لسة ، مرة يوم وما قبلتو وتاني يوم وتالت يوم ، يوم من الايام وانا قاعد في الفيس بالليل زي الساعة عشرة كده او حداشر جاني اشعار تم قبول طلب صداقتك من هديل ، أنا نطيت فوق من الفرح عملت فيها تقيل ما رسلت ليها رسالة بقيت بفتش في صفحتا ما لقيت ليها منشورات كتيرة بس في كم ولد عاميلين لايك لي منشوراتا وفتشت بروفايلاتم لقيتم في نفس جامعتا ، المهم افتح الدردشة القاها متضلة قلت ي زول النرسل ليها ، قمت رسلت ليها سلام وبتاع ووووو قالت لي مشتاقين ي عبدو انا لمن قالت لي كده تلبت عديل من السرير المهم الونسة ديك وكيفك وبتاع بقيت يوميا بتونس معاها علي الفيس والله وشلت رقمها ، ما اتصلت ليها بخجل والله كنت برسل ليها رسائل جمعة وكده ، مرت الايام وقلت ليها تجي تشرفيني في الجامعة قالت لي خلاص تمام بجيك ، اقسم بالله لمن قالت لي بجيك بقيت في كل مرة بتخيل أنها قاعدة معاي في الجامعة وبنتونس هديل دي انا بقيت بفكر فيها اليوم كلو قلبي اتعلق بيها شديد ، بقيت وانا جاي من الجامعة وماشي ليها بسع في غنية "محمود عبد العزيز" ربنا يرحمو عمري بعدو بالساعات عشان خاطر مواعيدا بقيت بترقب جيتا حددت لي انو تجيني الاسبوع الجاي بقيت بتمني اليوم ينتهي سريع عشان يجي يوم بكرة ويمر ...
الحلقة السادسة
#مدرسة_الحب
"جميل ذلك العشق الذي يكمن سره في العينين بكاء حين اللقاء وبكاء حين البعد"
ابو حميد
يا سلاااااااام ياخ انا فرحان فرح انو بكرة هديل ح تجيني في الجامعة ي سلااااام ح اتونس معاها يا ربي اقول ليها شنو اممممم منورة الجامعة لا لا لا مشتاقين يا هديل لا لا لا يا عبدو انت جنيت كيف تقول ليها مشتاقين ، ح اقول ليها يا بت خالتي الجامعة مرحبه بيك لا لا لا اها اصافحا ي ربي اها واذا صافحتها لا لا لا خلاص بسلم عليها ساي اها نمشي الكفيتيريا واعزما علي شنو امممممم يااااااخ
امي : ياود ي عبدو جنيت بتتكلم براك مالك سجمي ياولد
يا امي اتكلم شنو قاعد اراجع لي في مساءلة
امي: قوم قوم المغرب اذن امشي صلي
مشيت صليت المغرب وجيت من الحلاق ظبطت الحلاق يا زووول كنت فرحان شديد والله رقدت في السرير بي مزاج ادندن ساااااي ، فتحت الفيس لقيت رسالة فتحت الرسالة كانت من هديل " معليش يا عبدو بكرة ما بقدر اجيك الجامعة ماشة لي ناس عمي عمي عيان شوية مرة تانية ان شاء الله " انا لمن قريت الرسالة جاتني نفسيات اقسم بالله بقيت شايف اربعة اربعة ابلع في ريقي ، رديت ليها الرسالة قلت ليها ما مشكلة ، والله فتحت الصور بتاعت البلد لمن مشينا البحر بقيت بعاين في صورا ووبكي نمت اليوم داك حزين شديد اصعب حاجة انك تكون مأمل في شئ وفجأة تجيك خيبأة امل ، كم يوم لي قدام كنت حزين والله منفسن عديل ...
الحلقة السابعة والاخيرة
#مدرسة الحب
"دائما ما تسرق منا الايام اللحظات السعيدة منا من افرحه القدر ومنا من غارق في الاحزان بل في اعماق الاحزان"
من هديل قالت لي ما بقدر اجيك الجامعة اصبت بحزن شديد حتي مشيتي للجامعة كانت من غير نفس ...
عدت الايام وفي كل مرة كنت بطلب منها انو نتلاقي كنت برسل ليها طوالي وتراسلني عدت شهور هديل بتكبر في دواخلي كل يوم بقيت بتخيل روحي معاها ، بس تقريبا بقولو مرات العقل بيخدع ....
يوم من الايام رسلت ليها اسمها بعد كتبتو جنب البحر رسلت ليها الصورة وانا كاتب اسما ، ما كنت اتوقع ردها كده
"افهم شنو يعني " كده كان ردها وانا بتونس معاها بالفيس ، قلت ليها اتذكرتك وقلت اكتب اسمك ، ما اخفي عليك انا الساعة ديك خلاص مشاعري وصلت الحد وكان لازم ابوح فقمت قلت ليها يا هديل انتي ما احساسك شنو نحوي قالت لي عادي في شنو قمت رشلت ليها انا بصراحة يا هديل بحبك فكان ردها كالاتي
انتو اي واحد فيكم اتونس معاهو يقول لي بحبك ، قلت ليها انا بحبك ، قالت لي انا كنت خاته انو انت بتحبني ....
انهينا المحادثة بينا بل انا حزفت المحادثة .. ..
بعد كم شهر سمعت انو هديل اتقدم ليها زول ووافقت ، الخبر وقع علي زي الصدمة طبعا ليلي داك كلو ما نمت ...
كابنا خالات مشيت العرس واثناء ما بحفر في الخيمة دموعي جرن ، واللحظة الامام الجامع بعد صلاة الجمعة قال فيها ، علي كريمتة البكر الرشيد شفت الدنيا اربعة اربعة ...
ربما كان من حب من طرف واحد لكن الحقيقة هي ان عبد الرحمن احبها حبا حقيقا والي الان لم يحب غيرها بل يرد اسمها كل حين عندما يكون لوحده هديل تزوجت ولها ابناء الان ومنذ ذلك اليوم الذي اعترف لهديل بحبه لها في تلك المحادثة لم يراسلا بعضيهما علي الفيس وانقطع التواصل بينهما الا مجرد تعليقا علي صورة شخصية تعلق عليها هديل ، مكتفيا عبدو بي تسلمي بنت خالتي العزيزة .
انتهت ..... تحياتي
إرسال تعليق
0 تعليقات